પી. ચિદમ્બરમને આગોતરા જામીનની સિલ્વર જ્યુબિલીઃ શું આ જ કારણસર આપણે ‘મેરા ભારત મહાન’ કહીએ છીએ?

ઍરસેલ-મેક્સિસ કેસમાં ચિદમ્બરમ અને તેમના પુત્ર કાર્તિને ધરપકડ સામે સતત મળી રહેલા કાનૂની રક્ષણનું આશ્ચર્ય

તસવીર સૌજન્યઃ https://www.newslaundry.com

પી. ચિદમ્બરમ શેરબજાર અને શેરબજારનાં કૌભાંડોમાં સંડોવાયેલા હોવા વિશે અનેક જગ્યાએ શંકા વ્યક્ત કરવામાં આવી છે. હાલમાં આપણે આ બ્લોગમાં જ જોયું કે આ ભૂતપૂર્વ નાણાપ્રધાનને જાહેર પડકાર ફેંકવામાં આવ્યો હોવા છતાં તેમના પેટનું પાણીય હલતું નથી. એ કેમ હલતું નથી તેનું એક કારણ ન્યાયતંત્ર પાસેથી તેમને વારંવાર મળી રહેલી સુવિધા છે. આથી જ કહેવું રહ્યું કે આટલી સુવિધા તો પતિ-પત્ની પણ એકબીજાને નથી આપતાં.

લગ્નની સિલ્વર જ્યુબિલી ઉજવાય એમ પી. ચિદમ્બરમને ધરપકડ સામે મળેલા રક્ષણની સિલ્વર જ્યુબિલી હાલ ઉજવાઈ છે. તેમને ઍરસેલ-મેક્સિસ કેસમાં સતત પચ્ચીસમી વખત આગોતરા જામીન મળી ગયા છે.

ચિદમ્બરમ સામે એન્ફોર્સમેન્ટ ડિરેક્ટોરેટે આરોપ મૂક્યો છે કે તેમણે કેન્દ્રીય નાણાપ્રધાનપદનો દુરુપયોગ કરીને વિદેશી રોકાણકારો સાથે મળીને કાવતરું રચ્યું અને પોતાના દીકરા કાર્તિની કંપનીને મદદ કરી. તેઓ 2006માં નાણાપ્રધાન હતા ત્યારે તેમણે મોરિશિયસસ્થિત કંપની ગ્લોબલ કોમ્યુનિકેશન હોલ્ડિંગ સર્વિસીસ લિમિટેડને ટેલીકોમ સર્વિસ પ્રોવાઇડર કંપની ઍરસેલમાં રોકાણ કરવા માટે મંજૂરી આપી. તેમને માત્ર 600 કરોડ રૂપિયાનું રોકાણ મંજૂર કરવાની સત્તા હતી, પરંતુ તેમણે 3,500 કરોડ રૂપિયાના રોકાણ માટે મંજૂરી આપી. આ કેસમાં સેન્ટ્રલ બ્યુરો ઑફ ઇન્વેસ્ટિગેશને ચલાવેલી સમાંતર તપાસમાં કહેવામાં આવ્યું છે કે ઍરસેલ-મેક્સિસ કેસમાં કાર્તિને કટકી મળી હોવાથી ચિદમ્બરમે સત્તાનો દુરુપયોગ કર્યો. આ કેસમાં કાર્તિની સાથે સંકળાયેલી કંપનીને 26 લાખ રૂપિયા મળ્યા હતા. બીજા આશરે 90 લાખ રૂપિયા કાર્તિ અને તેના કઝીન એ. પલાનીપ્પને પ્રમોટ કરેલી ચેસ મૅનેજમેન્ટ કંપનીને મળ્યા હતા.

અદાલતે અકળ કારણોસર પી. ચિદમ્બરમ અને કાર્તિ ચિદમ્બરમને સતત ધરપકડ સામે રક્ષણ આપ્યું છે. અત્યાર સુધીમાં ચિદમ્બરમને 2018ની 9 માર્ચ, 20 માર્ચ, 16 એપ્રિલ, 1 મે, 29 મે, 4 જૂન, 9 જુલાઈ, 6 ઑગસ્ટ, 9 સપ્ટેમબર, 24 સપ્ટેમ્બર, 7 ઑક્ટોબર, 1 નવેમ્બર, 17 ડિસેમ્બર તથા આ વર્ષની 11 જાન્યુઆરી, 28 જાન્યુઆરી, 18 ફેબ્રુઆરી, 8 માર્ચ, 25 માર્ચ, 26 એપ્રિલ અને છેલ્લે 6 મેના રોજ દિલ્હીની વિશેષ અદાલતે ધરપકડ સામે રક્ષણ આપ્યું છે.

કાર્તિને પણ સતત ધરપકડ સામે રક્ષણ આપવા ઉપરાંત વિદેશ જવા માટે પરવાનગી આપવામાં આવતી રહી છે. આ જ કાર્તિ માટે મધરાતે 12 વાગ્યે અદાલતની કાર્યવાહી ચલાવવામાં આવી હતી, જેથી એ ભાઈ બીજા દિવસે પરોઢે પાંચ વાગ્યે ફ્લાઇટ પકડીને વિદેશ જઈ શકે. હાલમાં પાછો તેને 10 કરોડ રૂપિયાનો બોન્ડ આપીને વિદેશ જવાની પરવાનગી અપાઈ છે. એન્ફોર્સમેન્ટ ડિરેક્ટોરેટે ભારત, યુનાઇટેડ કિંગડમ અને સ્પેનમાં કાર્તિની 54 કરોડ રૂપિયા મૂલ્યની સંપત્તિને ટાંચ મારી છે.

એનએસઈના કો-લોકેશન કેસમાં સંડોવાયેલા અજય શાહ પી. ચિદમ્બર સાથે સંકળાયેલા હોવાનું અનેક અહેવાલોમાં બહાર આવી ચૂક્યું છે અને આપણે પણ તેના વિશે વાત કરી છે.

હાલમાં એનએસઈના આ કૌભાંડ બાબતે એક મહત્ત્વપૂર્ણ વિડિયો પ્રસિદ્ધ થયો છે, જે ભારતીય રોકાણકારોની આંખ ઉઘાડનારો છે. (https://youtu.be/VxCSQETjYlg)

રોકાણકારોનાં નાણાં સાથે રમનારા લોકોને અદાલતોમાં ધરપકડ સામે 25-25 વખત રક્ષણ મળે છે એ આશ્ચર્યજનક બાબત છે. આ રીતે લોકોની ભાવનાઓની સાથે પણ રમત થાય છે. એનએસઈના કેસમાં પણ સેબીએ કરેલી કાર્યવાહીનો આદેશ નબળો હોવાથી ઍપલેટ ટ્રિબ્યુનલે તેની સામે સ્ટે આપી દીધો છે.

દેશના અગ્રણી ઉદ્યોગપતિએ પણ અમુક રકમ ચૂકવાય નહીં તો જેલમાં જવું પડે એવી સ્થિતિ હાલમાં ઊભી થઈ હતી. તેમના ભાઈએ સમયસર આર્થિક મદદ કરતાં તેઓ બચી ગયા. જો કાયદાની નજરમાં બધા સરખા હોય તો આ એક માણસને 25-25 વખત આગોતરા જામીન આપવા પાછળનું સ્પષ્ટ કારણ પણ દેખાવું જોઈએ, જે કમનસીબે અત્યાર સુધી ક્યાંય દેખાયું નથી.

શેરબજારનાં વર્તુળોમાં તો વર્ષોથી કહેવાતું આવ્યું છે કે આ પિતા-પુત્ર શેરબજારમાં મોટાપાયે સટ્ટો કરે છે અને તેઓ બજારને રમાડે છે. કો-લોકેશન દ્વારા અમુક ગણ્યાગાંઠ્યા લોકોને ગેરરીતિથી કમાણી કરી લેવાની તક આપવામાં આવે છે ત્યારે પોતાની મહેનતની કમાણી આ બજારમાં રોકીને પ્રામાણિકપણે વળતર મેળવવાની કોશિશ કરનાર રોકાણકારોને અન્યાય થાય છે.

બજારને રમાડનારાં આ તત્ત્વો વિરુદ્ધ કોઈ કાર્યવાહી ન થાય અથવા તો તેઓ કાર્યવાહીમાંથી આબાદ છટકી જાય ત્યારે ખરી ભાવનાથી નહીં, પણ મહેણા તરીકે કહેવાનું મન થાય કે ‘મેરા ભારત મહાન!’

———————

પી. ચિદમ્બરમ, કે. પી. કૃષ્ણન અને રમેશ અભિષેક વિરુદ્ધ વારંવાર ગંભીર આક્ષેપો થવા છતાં તેઓ હજી કેમ ચૂપ બેઠા છે?

ફાઇનાન્શિયલ ટેક્નૉલૉજીસ ઇન્ડિયા લિમિટેડ (એફટીઆઇએલ – નવું નામ 63 મૂન્સ ટેક્નૉલૉજીસ લિમિટેડ)ના સ્થાપક જિજ્ઞેશ શાહને ટાર્ગેટ બનાવવામાં આવ્યા છે અને એ ષડ્યંત્રમાં ભૂતપૂર્વ નાણાપ્રધાન પી. ચિદમ્બરમ, નાણાં ખાતાના ભૂતપૂર્વ સચિવ કે. પી. કૃષ્ણન અને ફોરવર્ડ માર્કેટ્સ કમિશનના ભૂતપૂર્વ ચેરમેન રમેશ અભિષેક સામેલ હોવાની શંકા છે એવું જણાવતું પુસ્તક 2016માં પ્રગટ થયું હતું. ખ્યાતનામ પત્રકાર-લેખક શાંતનુ ગુહા રેએ ‘ટાર્ગેટ’ નામે એ પુસ્તક લખ્યું હતું. અંગ્રેજી અને દેશની નવ અગ્રણી ભાષામાં અનુવાદ થયા બાદ એ પુસ્તક એમેઝોન પર અને ક્રોસવર્ડ પર એ દરેક ભાષામાં સતત બેસ્ટ સેલર બની રહ્યું હતું.

આપણો આજનો મુદ્દો એ છે કે પી. ચિદમ્બરમ સહિત ઉક્ત ત્રણે વ્યક્તિઓને જિજ્ઞેશ શાહે એક નહીં, પણ બે વખત મુક્ત ચર્ચા માટે આહ્વાન આપેલું છે, છતાં તેમાંથી કોઈએ એના વિશે એક શબ્દ પણ ઉચ્ચાર્યો નથી. એટલું જ નહીં, છેલ્લે એફટીઆઇએલના ચેરમેન વેંકટ ચારીએ પત્રકાર પરિષદમા જાહેર કર્યું કે આ ત્રણે વ્યક્તિઓ વિરુદ્ધ કંપનીએ નુકસાન ભરપાઈનો 10 હજાર કરોડ રૂપિયાનો દાવો માંડ્યો છે. ઉપરાંત, વ્યક્તિગત સ્વરૂપે પણ ત્રણેયની સામે સત્તાના દુરુપયોગ અને ભ્રષ્ટાચાર બદલ સીબીઆઇમાં ફરિયાદ પણ કરવામાં આવી છે.

જ્યારે જિજ્ઞેશ શાહે પત્રકાર પરિષદમાં ત્રણેયને ઓપન ડિબેટ માટે પડકાર ફેંક્યો અને એફટીઆઇએલે તેમની વિરુદ્ધ નુકસાન ભરપાઈનો દાવો માંડ્યાનું જાહેર કર્યું ત્યારે શાહે એક જ વાત દોહરાવી હતી કે તેમને ન્યાયતંત્ર પર પૂરેપૂરો વિશ્વાસ છે. ‘સત્યમેવ જયતે’ થશે એવું તેઓ દૃઢપણે માને છે. હાલમાં સર્વોચ્ચ અદાલતે એનએસઈએલ અને એફટીઆઇએલનું મર્જર કરવાના સરકારના આદેશને રદ કર્યો ત્યારે શાહની ન્યાયતંત્ર પરની શ્રદ્ધા ફરી એક વાર સિદ્ધ થઈ. કંપનીએ પત્રકારોને આપેલી પહેલી પ્રતિક્રિયામાં માત્ર એટલે જ કહ્યું હતું – સત્યમેવ જયતે.

નોંધનીય રીતે એ જ દિવસે સેબીએ એનએસઈ વિરુદ્ધના ઍલ્ગરિધમિક ટ્રેડિંગને લગતા કેસમાં એક્સચેન્જને 675 કરોડ રૂપિયા જેટલો દંડ ફટકાર્યો. સાથે સાથે ઍલ્ગરિધમિક ટ્રેડિંગ માટે એનએસઈના ડેટાનો દુરુપયોગ કરવા બદલ ઇન્ફોટેક ફાઈનાન્શિયલ સર્વિસીસ, તેના બે કંપનીના ડિરેક્ટર્સ અને અજય શાહ વિરુદ્ધ કાનૂની પગલાં લેવાનું એક્સચેન્જને કહ્યું હતું.

સુનિતા થોમસ અને કૃષ્ણા ડગલી ઇન્ફોટેકના બે ડિરેક્ટર્સ છે જ્યારે અજય શાહ સુનિતા થોમસના પતિ છે. અજય શાહે ઇન્ફોટેક અને તેના બે ડિરેક્ટર્સની સાથે મળીને એક યોજના ઘડી હતી, જેને LIX પ્રોજેક્ટ એવું નામ આપવામાં આવ્યું હતું. તેમણે LIX વિકસાવવાના નામે એક્સચેન્જ પાસેથી ડેટા ટ્રાન્સમિશન સર્વિસ મેળવી, જેનો દુરુપયોગ તેમણે સિક્યૉરિટીઝ માર્કેટમાં વેચી શકાય એવી ઍલ્ગરિધમિક ટ્રેડિંગ પ્રૉડક્ટ્સ વિકસાવવા માટે કર્યો. આ પ્રૉડક્ટ્સ નાણાં કમાવાનું એક સાધન હતી, એમ સેબીના આદેશમાં કહેવામાં આવ્યું હતું.

આપણે અગાઉ આ બ્લોગમાં લખી ગયા છીએ કે અજય શાહ પી. ચિદમ્બરમના માનીતા છે. કે. પી. કૃષ્ણન પણ તેમાં કેવી રીતે સંડોવાયેલા હોઈ શકે તેની વાત પણ આપણે એ બ્લોગમાં કરી હતી (https://vicharkranti2019.wordpress.com/2019/04/26/ભારતીય-નિયમનકારોનું-વલણઃ/). હવે પાછા સર્વોચ્ચ અદાલતે રદ કરેલા મર્જરની વાત પર આવીએ. પોતે નિયમનકાર નથી એવું ગાણું ગાયે રાખનાર ફોરવર્ડ માર્કેટ્સ કમિશનના ચેરમેન રમેશ અભિષેકે મર્જર માટેની ભલામણ કરી હતી, જેને કંપનીસંબંધી બાબતોના ખાતાએ સ્વીકારીને મર્જરનો આદેશ બહાર પાડ્યો હતો.

આમ, પી. ચિદમ્બરમ, કે. પી. કૃષ્ણન અને રમેશ અભિષેકની ત્રિપુટી સામે વારંવાર આંગળી ચિંધાઈ છે અને તેમને ખુલ્લી ચર્ચા કરવા માટેનો પડકાર પણ ફેંકવામાં આવ્યો છે. આમ છતાં, તેમના તરફથી કોઈ ચૂં કે ચાં થયું નથી. આ બાબત ખરેખર રહસ્યમય છે અને જ્યાં સુધી ત્રિપુટી જાહેર ચર્ચા કરવા માટે તૈયાર નહીં થાય અથવા તો કોઈ અદાલતમાં તેમની વિરુદ્ધ પુરાવા જાહેર નહીં થાય કે પછી તેમની સંડોવણી જાહેર નહીં થાય ત્યાં સુધી એ રહસ્ય અકબંધ રહેશે. તેઓ બીજાં કેટલાંય રહસ્યો છુપાવીને બેઠા હશે એ તો રામ જ જાણે!

———————————